الحمد لله والصلاة والسلام على رسول الله
اما بعد
كل شوية علي الاميل او في الكتير من المنتديات الاقي فيه احاديث يتنشر ويكتب فيها قال رسول الله صلى الله عليه وسلم كذا
الكلام يعجبني جدا واتاثر بيه بس يدور في ذهني سؤال
هل فعلا الرسول عليه الصلاة والسلام قال كده ؟
ولا ممكن يكون كلام أي حد تاني ومنسوب بس للنبي عليه الصلاة والسلام
اللي اعرفه ان أي كلام ثابت ان النبي عليه الصلاة والسلام قاله يجب تنفيذه واتباعه
وساعات اسال نفسي سؤال
طالما الكلام حلو وكويس ويقرب من ربنا وانا مش هدفي الا الخير للناس ونفسي الناس كلها تتقرب من ربنا ليه منشرش الخير ده عليهم
ليه كل ما يعجبني حديث واحد يقولي ده حديث ضعيف او ده حديث موضوع
ايه المانع اني انقله طالما كلام مفيد ونافع؟؟
وسالت بعض الشيوخ في السؤال ده بالذات
قالوا اجابات شبت من هولها
قالوا انت تقول قال رسول الله ؟
هل انت متاكد ان رسول الله قال ؟
قلت الله اعلم ممكن اه وممكن لا
قالولي انت لما تقول على حديث قال رسول الله وهوا مقالش تبقا بتكدب عليه لانك بتقول كلام على لسانه هوا مقالهوش
وفيه حديث صحيح بيقول فيه الرسول صلى الله عليه وسلم
(إن كذبا علي ليس ككذب على أحد من كذب علي متعمدا فليتبوأ مقعده من النار" رواه البخاري)
وفيه حديث تاني بيقول فيه
(لا تكذبوا علي فإنه من كذب علي فليلج النار ) رواه البخاري
(من حدث عني بحديث يُرى أنه كذب فهو أحد الكاذبِِينَ) رواه مسلم
بصراحه خفت وقلت حتى لو نيتي كويسة مش عاوز الا الخير للناس
قالوا لما ربنا نزل الاية
(اليوم اكملت لكم دينكم )
الدين ساعتها كان اكتمل ولا لا ؟
هل قصر النبي صلى الله عليه وسلم في تبليغ الناس الرسالة ؟
يعني الدين مش في حاجة للاحاديث اللي مش متاكدين من ان الرسول عليه الصلاة والسلام قالها؟
فما معني اننا نترك ايات القران والسنة الصحيحة مننشرهاش وننشر الاحاديث مجهولة المصدر؟
معناه اننا كده بنقول ان الرسول عليه الصلاة والسلام مات ولم يكمل لنا الدين بدليل ان فيه ناس بتكمله من بعده وبتنسبه كذب للرسول عليه الصلاة والسلام
سالت انا مش عالم اعرف منين ان ده صحيح ولا مش صحيح وهل انشر الحديث ده ولا لا؟
قالوا اعتبر كل حديث قدامك انه غير صالح للنشر الا بعد التاكد من احد العلماء انه صحيح او موجود في الكتب اللي فيها احاديث صحيحة مثل صحيح البخاري وصحيح مسلم وفيهم اكتر من 8000 حديث في كل النواحي التي تهم المسلم
واي حديث تاني بعد كده لازم حد من العلماء انه يكون قال ان الحديث ده صحيح زي الشيخ الالباني وغيره من العلماء
واضافوا لمزيد من التوضيح انه بعد موت النبي صلى الله عليه وسلم فيه ناس حبت تهدم الاسلام فالفت احاديث ونسبتها للنبي
بس ربنا هيأ لدينه علماء بذلوا عمرهم كله عشان ميدخلش حديث من الكذب ده على سنة النبي صلى الله عليه وسلم فعشان كده لازم قبل ما نتكلم ونقول قال رسول الله صلى الله عليه وسلم اننا نتاكد الاول
وهنا كان لي سؤال اخير واللي فات ؟؟
قالولي اللي فات ربنا يعفو عنه لانك كنت تنشر عن جهالة فمتكررش الغلط تاني ونبه اخوانك وكل حبايبك اللي بيحبوا الخير زيك انهم ميقعوش في نفس الغلط
رجاء اخير احذروا عند نقل اي حديث عن الرسول فان لم تستطع التاكد من صحة الحديث فابتعد بنفسك عن الشبهات وان تقول علي النبي كذب
واسال الله الخير لي ولكم
وربنا يسترنا في الدنيا والاخرة ويتجاوز عننا ويتقبل مننا
اسال الله لي ولكم الجنة مستقرا ومقاما برفقة خير الخلق محمد صلي الله عليه وسلم
والسلام عليكم ورحمة الله وبركاته[i]
موضوع: رسائل تعبنا منها 
الثلاثاء أغسطس 05, 2008 3:36 pm
