خايف في يوم اصحي ملقاش مصر

ساعات بقلق بالليل
يعني بالليل شوية كده
قبل الفجر
حسب الظروف كده
بعد العصر
خايف يوم أصحي..
وأفتح الشباك..
مالاقيش مصر

ألاقيها لمت هدومها ومشيت
لمت هدومها
علي نيلها
علي هرمها
وطفشت
وحلفت ميت يمين ماهي قاعدلنا
ماهي زهقت..
تعبت..
إتخنقت
أصلنا زودناها..
أكننا استعمرناها..
ورثناها

مصر البنوتةالحلوة
اللي زي القمر
بقت عجوزة وشايبة
وبان عليها الكبر

خايف يوم أصحي..
وأفتح الشباك..
مالاقيش مصر
*************************
بص .. حا أقولك ...
م الأخر ...
أنا عندي عربيه ...
مركبتهاش …
ومعايا فلوس ...
مكسبتهاش ….
وجوزوني بنت حلوة ...
محبتهاش ….
وإشتريت بدلة جديدة ...
ملبستهاش ….
كسرت الحمام وغيرتة
محستش بأي إنتعاش ..
خدت بعضي علي جنب ...
وكان يوم حر ... رطوبة ...
وقولت لروحي ....
إيه ياعم ...
إنت طوبة .....
قاللي لأ ....
يا صحبي دي حسبة ...
ومحسوبة …
أنا أصلي زمان .....
لمست قلبي ..
غنوة حب جميلة ... جميلة
لكن يا خسارة ...
محضنتهاش
**************************
بقول لهم
مين اللى بيعيط بحرقة دة ؟
قالو ا لى
مواطن اتصور وهو بينضرب
قلت لهم
ومين الأمور اللى بيضحك دة ؟
قالو ا لى
دة واحد عمل شوية كوارث وهرب
قلت لهم
والدنيا عتمة هناك كدة لية
قالوا لى
دى حتة جديدة بتتخرب
قلت لهم
ومين الحاوى اللى بيتكلم دة ؟
قالو ا لى دة الوضع بيتقلب
واية الهيصة اللى فى الساحل الشمالى دي ؟
قالو ا لى
دى البقرة بتتحلب
قلت لهم وانتم قلقانين كدة لية ؟
قالو دخلنا امم افريقيا
وخايفين نتغلب
************************
مش أنا امبارح
رحت من بيتنا في السيدة
للشغل في حلوان
في سبع دقايق
لا شوفت حد زعلان
ولا حد متضايق
والورد إنسان
والنخل متعايق
والناس جميلة مؤدبة
والجو رايق
والدنيا ماشية لوحدها
ولا حد سايق
ومش انا
امبارح برضه
رجعت من الشغل في حلوان
لبيتنا في السيدة
في خمس دقايق
لا حاسس بغربة
ولا شايف غريب
وقلبي ابيض حليب
عندليب
كروان فرحان
شايل ف قلبي وف جيوبي
الفرح أشكال وألوان
وزعت ع الشوارع
والبيوت والجيران
وطلعت البيت
ضربت الجرس
فتحت مراتي وبالأحضان
والعيال كمان فرحانين
ناجحين وجايبين
الدرجات النهائية
من غير دروس خصوصية
قمنا رقصنا وغنينا
واحتفلنا واتغدينا
فضلة خيرك
سمك واستاكوزا
وجمبري م الكبير
وحلينا ب مهلبية
وشربنا الشاي كمان
وفجأة
لقيتني بردان بردان
بصيت لقيت
الشباك مفتوح
ومفيش بطانية
ومراتي جنبي وزي ما هيه
لسة بتعاني من آلام المفاصل
وده اللي حاصل
قولتلها معلش يامراتي
اصلي بحلم كتير
والحمد لله
على كل شيء